Xəbərlər // 2026 6-may, 14:37

Maaşlarla bağlı müjdə — Yaxın aylarda hər şey dəyişəcək

Azərbaycanda muzdlu işçilərin əməkhaqqı sistemində köklü dəyişiklik gözlənilir. Artıq vətəndaşlar maaşlarını işəgötürənin təyin etdiyi deyil, özlərinin seçdiyi bankdan ala biləcəklər.

HesenEskeri.Az xəbər verir ki, bu barədə Azərbaycan Mərkəzi Bankının sədri Taleh Kazımov keçirdiyi mətbuat konfransında danışıb. Hazırda bu layihə üzərində Əmək və Əhalinin Sosial Müdafiəsi Nazirliyi ilə birgə intensiv iş aparılır. Artıq texniki inteqrasiya mərhələsinə keçilib və yaxın 2-3 ay ərzində əməkhaqqının liberallaşdırılmasına başlanılacaq.

Taleh Kazımovun sözlərinə görə, əsas məqsəd həm dövlət, həm də özəl sektorda çalışan şəxslərin sərbəst seçim imkanını təmin etməkdir.

"İstəyimiz odur ki, həm dövlət, həm də özəl sektorda çalışan muzdlu işçilər istədikləri bankda rahat şəkildə maaşlarını ala bilsinlər" – deyə baş bankir bildirib.

Layihənin əhatə dairəsi təkcə işləyən şəxslərlə məhdudlaşmayacaq. Növbəti mərhələdə pensiyaçılar və sosial müavinət alan şəxslər də bu xidmətdən yararlana biləcəklər. Mərkəzi Bankın sədri qeyd edib ki, yaradılan yeni sistem vətəndaşın seçiminə bağlı olacaq və kənar müdaxiləni istisna edəcək. Prosesin tam yekunlaşması üçün təxminən 4 ay vaxt lazımdır. Bu addım banklar arasında rəqabəti artıracaq və müştərilərə göstərilən xidmət səviyyəsini yüksəldəcək.

Yəni, bundan sonra müəssisə rəhbəri sizin maaşınızı hansı bankdan alacağınıza qərar verməyəcək, siz özünüzə ən sərfəli və rahat gələn bankı seçib kartınızı oradan əldə edə biləcəksiniz.

(milli.az)