Nazirlikdən məktəbli formaları ilə bağlı direktorlara TAPŞIRIQ - YENİLƏNİB + FOTO/VİDEO

Xəbərlər // 2022 12-sentyabr, 18:31

Elm və Təhsil Nazirliyi məktəb direktorlarına şagirdlərdən məktəbli forması tələb etməmələrinə dair müvafiq tapşırıq verib.
Bu barədə cavab olaraq nazirlikdən bildirilib.
Qeyd olunub ki, 2022-2023-cü tədris ilində yeni məktəbli formalarının tətbiqi ilə bağlı hər hansı məcburiyyət yoxdur:
“Şagirdlər ötənilki formaları ilə məktəbə gələ bilərlər. Bununla bağlı, məktəb direktorlarına şagirdlərdən məktəbli forması tələb etməmələrinə dair müvafiq tapşırıq verilib. Valideynlər məktəbli formaları ilə bağlı hər hansı sual və ya problem olduğu halda Elm və Təhsil Nazirliyinin 146-6, Bakı Şəhəri üzrə Təhsil İdarəsinin isə 146-1 “Çağrı Mərkəzi” ilə əlaqə yarada bilərlər”.

14:12
“Məktəbli formaları ilə bağlı heç bir məcburiyyət yoxdur. Dəfələrlə bununla bağlı açıqlama da verilib ki, heç bir məcburiyyət ola bilməz. Yəni məktəb direktorlarının belə bir tələb irəli sürməsi doğru deyil”.
Bu sözləri açıqlamasında Bakı Şəhəri üzrə Təhsil İdarəsinin İctimaiyyətlə əlaqələr sektorunun müdiri Bəşarət Məmmədov deyib.
O, elm və təhsil naziri Emin Əmrullayev də bununla bağlı açıqlama verdiyini diqqətə çatdırıb.
12:22
Bakı Tikiş Evinin qarşısında məktəbli forması ilə bağlı izdiham yaşanır. Valideynlər forma tapmaqda çətinlik yaşadıqlarını deyirlər.
Baku TV-nin əməkdaşı məsələ ilə bağlı Elm və Təhsil Nazirliyindən münasibət öyrənib.
Nazirliyin mətbuat katibi Cəsarət Valehov bildirib ki, məktəbli formaları ilə bağlı Təhsil Nazirliyi hər hansı şirkətlə əməkdaşlıq etmir, sifariş həyata keçirmir, bu işlə özəl müəssisələr məşğul olurlar.
“Məktəbli forması olmadan tədrisin ilk günü məktəbə getmək olmaz deyə məcburiyyət yoxdur. Valideynlər formanı sonra da ala bilərlər”, - deyə əlavə edilib.

11:54
Bu gün məktəbli forması almaq istəyən valideynlər Bakı Tikiş Evinin qarşısında izdiham yaradıb.
Bakı Tikiş Evinin (BTE) satış şöbəsinin müdiri Etibar Əzimov bununla bağlı açıqlama verib.
O bildirib ki, tək bir müəssisə bütün Bakı şəhərini forma ilə təmin edə bilməz:
“Məktəbli formaları üçün heç bir qurum bizə müraciət etməyib. Biz dövlət müəssisəsi deyilik, özəl qurumuq. Biz bank krediti ilə işləyirik. Aşağı faizlə də bizə kredit verən yoxdur. Gərək əvvəldən bu işə razılaşmazdıq. İndi hamı məsuliyyəti bizim üzərimizə atır”.
E.Əzimov bildirib ki, tikiş evi hər gün 1200-1500 forma istehsal edə bilir:
“Hazırda tələbat qısaqol köynəklərədir. Yay üçün biz qısaqol forma hazırladıq, uzunqol köynəklər də hazırlanır”.
Şöbə müdiri izdihamda günahı məktəb direktorlarında görüb:
“Direktorlar valideynləri məcbur edirlər ki, mütləq forma ilə gəlin məktəbə. Bir fabrik hamını necə təmin etsin? Nazir də bildirib ki, bu tövsiyə xarakterlidir. Camaatı belə təşvişə salmaq olmaz. Bizim burada heç bir günahımız yoxdur”.
Sonda E.Əzimov bildirib ki, hazırda 30 mindən çox forma satılıb.

11:07
Hazırda Bakı Tikiş Evinin (BTE) qarşısında izdiham yaşanır.
Oxu.Az-ın əməkdaşının verdiyi məlumata görə, vətəndaşlar üç gündür BTE-nin qapılarının onların üzünə qapanmasından və heç yerdə məktəbli forması tapa bilməməsindən gileylənirlər.
Onların sözlərinə görə, məktəblər isə ancaq BTE-nin emblemi olan formaların geyinilməsinə icazə verirlər. Üstəlik digər ticarət mərkəzlərində satılan formaların üçqat baha olduğunu bildirirlər.

Hazırda yaşanan izdihamın qarşısını almaq üçün əraziyə polis əməkdaşları cəlb olunub. BTE bir neçə dəqiqə əvvəl vətəndaşların hissə-hissə mərkəzə daxil olmasına imkan yaradıb.
Qeyd edək ki, bu il BTE ancaq ibtidai siniflər üçün məktəbli forması istehsal edib.
“Photostock.az”ın əməkdaşları ərazidən fotolar lentə alıb:

10:40
Valideynlər məktəbli geyimlərini əldə etmək üçün Bakı Tikiş Evinə üz tutublar.
bu da Bakı Tikiş Evinin qarşısında böyük izdihama səbəb olub.