Səhiyyə // 2021 29-iyun, 16:45

Pandemiya nə vaxt bitəcək? - Həkim və astroloqun PROQNOZU: “Virusa qarşı çıxanlar sanki cəzalandırılır

2019-cu il dekabrın ortalarında Çinin mərkəzi Hubey əyalətinin Uhan şəhərində Huanan ət və dəniz məhsulları bazarı ilə əlaqəli yerli sakinlərdə naməlum mənşəli pnevmoniya xəstəliyinin ilk aşkar olunması ilə başlayan, 2020-ci 11 fevraldan etibarən pandemiya elan olunan COVID-19 hələ də bizimlədir.

Həm də mutasiyaya uğramış müxtəlif və daha təhlükəli ştammlarla...

Mütəxəssislərin pandemiyanın başa çatacağı ilə bağlı indiyə kimi verdikləri proqnozlar isə müxtəlifdir. Bəs əksər ölkələrdə, o cümlədən Azərbaycanda virusun yayılmasının stabilləşdiyi bir dövrdə hansı proqnozları vermək olar?
 
Modern.az-ın sualını ilkin olaraq, Milli Məclisin Əmək və sosial siyasət komitəsinin sədri, ixtisasca həkim Musa Quliyev cavablandırıb.

Komitə sədri deyib ki, bütün dünyanın informasiyasının toplandığı Ümumdünya Səhiyyə Təşkilatının mütəxəssisləri belə, pandemiyanın nə vaxt başa çatacağı ilə bağlı proqnoz verməkdə çətinlik çəkirlər.


“Bu sahədə böyük təcrübəyə sahib olan epidemioloq alimlər də bir söz deyə bilmirlər. Çünki bu, dünyada indiyə qədər misli görünməmiş pandemiyadır. Təəssüf ki, virus tez-tez öz modifikasiyasını dəyişir, müxtəlif ştammlarla daha sürətlə yayılmağa başlayır. Virusun təbii yolla dünyadan tamamilə yox olması, epizodik hallarda təkrarlanması barədə fikir bildirmək tezdir. Amma nə qədər çox vaksin vurulacaqsa, virus bir o qədər də tez yox olacaq. Ona görə vətəndaşlarımız vaksinasiya prosesində daha sürətlə iştirak etməlidirlər. Yumşalmalara baxmayaraq, özlərini klassik üsullarla, maska, sosial məsafə və gigiyenik qaydalara riayət etməklə qorusunlar”.
 
M.Quliyev COVID-19-un təhlükəli ştammlarına da diqqət çəkib:

“Hindistan varinatının Delta ştammı olduqca təhlükəli hal almağa başlayıb. Hətta vaksinasiya olunanların da xəstəliyə yoluxma və onu ağır keçirmə riski böyükdür. Azərbaycanda 4 növ vaksindən istifadə edilir və kifayət qədər ehtiyatımız mövcuddur. Düşünürəm ki, vaksiansiya prosesini nə qədər sürətləndirksək, bir o qədər idarəolunan vəziyyətə çatacağıq.
Xüsusilə yumşalmalara gedildiyi, toyların başlanmasına icazə verildiyi, iri ticarət obyektlərinin fəaliyyətinin bərpa olunduğu, çimərlik mövsümünə start evrildiyi bir vaxtda daha da ehtiyatlı olmalıyıq”.
 
“Qoroskop” qəzetinin baş redaktoru, astroloq Səbuhi Rəhimli Modern.az-a danışarkən hələ aylar əvvəl mayın sonundan etibarən yumşalmalara gediləcəyinin proqnozunu verdiyini xatırladıb:

“Mən demişdim ki, mayın sonundan etibarən dünyada yumşalma olacaq. Proqnozum özünü doğrultdu, elə Azərbaycanda mayın 31-dən etibarən yeni qərarlar qüvvəyə mindi.

Amma koronavirus idarə edilən virus olduğu üçün “bu sondur” demək olmaz. Mənim üçün koronavirusla bağlı şübhəli məqamlar çoxdur, ona görə virusu qəbul eləmirəm. Pandemiya, bunu idarə edənlərin istəyinə bağlı olaraq bitəcək. Mən görücü deyiləm, qeyri-adi qabiliyyətim yoxdur. Sadəcə proseslərin analizinə əsasən, fikir bildirirəm.
Elə bil mən deputatlığa namizədəm. Rəqiblərimin də, özümün də gücünü hesablayıram ki, qalib sizsiniz. Amma Məzahir Pənahov 3-cü, 4-cü yerdə olan adamı gətirib deputat təyin edirsə, buna astrologiya neyləsin? Bəzən mənə olan ittihamlar buna görədir. Mən faktı deyirəm, kimsə faktı dəyişirsə, bu mənim günahım deyil. Bir kənddən 17 nəfər vəfat edib: biri qocalıqdan, biri böyrəkdən, biri şişdən, hamısını ümumiləşdirib deyirlər “koronavirusdan ölüb”.

Sanki statistka verirlər. İtaliya hələ keçən il qadağaları ləğv etdi, o saat ölkədə vəziyyət pisləşdi. İsrail demişdi ki, iyulun 1-dən əvvəlki qaydalara qayıdacaq, dərhal İsrail önə çıxdı, İran da o cümlədən. Kim bu virusa qarşı çıxırsa, sanki onu cəzalandırırlar. Ona görə də bu, sadəcə gülüş doğurur. Və idarə edilən bir şey üçün proqnoz vermək olmaz!”.