Bununla bağlı hüquqşünas Rəhim Xoyski Demokrat.az-a bildirib ki, qanunun mətninə əsasən, "erkən evlilik" anlayışını rəsmi olaraq uşaqla nikah bağlamadan ailə qurmaq məqsədilə yaradılan ittifaq kimi xarakterizə edir:

“Bu o deməkdir ki, dövlət təkcə qeyri-qanuni rəsmi nikah cəhdlərini deyil, faktiki olaraq uşağı ailə qurmağa yönəldən hər cür qeyri-rəsmi birgəyaşayış formalarını da erkən evlilik kimi tanıyır və qadağan edir. Erkən evliliyin qarşısının alınması uşaqların hüquq və azadlıqlarının təmin edilməsi sahəsində dövlətin əsas vəzifələrindən biri kimi təsbit edilib. Qanunun xüsusilə 38.6-cı maddəsi birbaşa valideynlərin bu məsələdəki məsuliyyətini müəyyən edir. Həmin maddəyə əsasən, uşaqların erkən evliliyə daxil olmağa məcbur edilməsi, erkən evliliklə bağlı valideynlər arasında qabaqcadan hər hansı razılaşmanın və ya sövdələşmənin aparılması, erkən evliliklə bağlı nişan, toy və ya digər adət-ənənəyə uyğunmərasimlərin təşkil olunması, uşaqlar barədə dini kəbinkəsmənin həyata keçirilməsi hüquq pozuntusu hesab edilir”.  
O deyib ki, qanunun erkən nikaha daxil olmaqla bağlı müddəalarını pozan şəxslər Azərbaycan Respublikası Cinayət Məcəlləsinə əsasən məsuliyyət daşıyırlar:

“Bu işin hallarından asılı olaraq 3 min manatdan 4 min manatadək miqdarda cərimə və ya 4 ilədək müddətə azadlıqdan məhrum etmə ilə cəzalandırıla bilərlər. Həmçinin erkən evliliyin təşkil edilməsinə görə, işin hallarından asılı olaraq şəxslər 2 min manatdan 3 min manatadək cərimə, 2 ilədək azadlığın məhdudlaşdırılması və ya 2 ilədək müddətə azadlıqdan məhrum etmə cəzalandırıla bilərlər. Bundan başqa valideynlər öz vəzifələrini yerinə yetirmədikdə və ya uşağa qarşı zorakılığa yol verdikdə, Ailə Məcəlləsinin 64-cü maddəsinə əsasən onlar valideynlik hüquqlarından məhrum edilə də bilərlər”.