Xəbərlər // 2026 28-aprel, 13:44

Bu şəxslər üçün 3 aylıq kirayə pulu ayrıldı — Prezident sərəncam imzaladı

Keşlə qəsəbəsində subasma nəticəsində evi və əşyaları zədələnən sakinlərə dövlət tərəfindən həm təmir yardımı ediləcək, həm də müvəqqəti qaldıqları kirayə mənzillərin pulu ödəniləcək.

Demokrat.az xəbər verir ki, Prezident İlham Əliyevin imzaladığı yeni sərəncama əsasən, sel və daşqınların fəsadlarını aradan qaldırmaq üçün Bakı Şəhər İcra Hakimiyyəti konkret addımlar atacaq.

Nizami rayonunun Keşlə qəsəbəsində çirkab suların zərər vurduğu 61 fərdi yaşayış evi tam bərpa ediləcək. M.Ə.Sabir və B.Mirzəyev küçələrində yerləşən bu evlərin təmiri ilə yanaşı, yararsız hala düşmüş məişət əşyalarına görə də sakinlərə maddi yardım ayrılacaq. Aidiyyəti qurumlar artıq dəymiş ziyanın qiymətləndirilməsi xərclərini də bu paketə daxil ediblər.

Dövlət dəstəyi təkcə təmir işləri ilə məhdudlaşmır. Evləri bərpa olunan müddətdə həmin ailələrin yaşayış sahəsi ilə təmin edilməsi üçün 3 aylıq kirayə haqları ödəniləcək. Bu ödənişlərə sakinlərin bank xərcləri də əlavə olunub ki, vətəndaşlar əlavə maliyyə yükü ilə qarşılaşmasınlar.