Xəbərlər / Dünya // Bu gün, 15:58

Qətliamı törədən hər iki şagird hər gün saatlarla bu oyunu oynayırmış

Türkiyənin Şanlıurfa və Kahramanmaraş şəhərlərində baş verən silahlı məktəb hücumları ölkədə böyük sarsıntıya səbəb olub. Ard-arda törədilən iki dəhşətli hadisə nəticəsində bir müəllim və səkkiz şagird həyatını itirib, 33 nəfər isə müxtəlif dərəcəli xəsarətlər alıb.

Demokrat.az xəbər verir ki, hadisələrlə bağlı aparılan ilkin araşdırmalar zamanı hər iki cinayətkarın profilində ciddi bir bənzərlik aşkar edilib. Məlum olub ki, hücumu törədən yeniyetmələr uzun müddət şiddət tərkibli "PUBG" oyununun aludəçisi olublar. Hüquq-mühafizə orqanlarının məlumatına görə, hər iki şəxs gününün böyük hissəsini kompüter arxasında bu oyunu oynayaraq keçirib. Bu fakt azyaşlıların nəzarətsiz şəkildə aqressiv oyunlar oynamasının yaratdığı təhlükələri yenidən gündəmə gətirib.

Xronologiyaya nəzər salsaq, ilk hadisə aprelin 14-də Şanlıurfanın Siverek rayonundakı peşə liseyində baş verib. Orada törədilən hücumda 16 nəfər yaralanıb. Bu hadisədən cəmi bir gün sonra oxşar qətliam Kahramanmaraşın Onikişubat rayonunda yerləşən orta məktəbdə təkrarlanıb.

Kahramanmaraşdakı hadisəni 8-ci sinif şagirdi İsa Aras Mersinli törədib. O, təqaüdçü polis rəisi olan atasının silah və sursatlarını götürərək məktəbə gəlib və iki sinfə atəş açıb. Silahlı hücum zamanı riyaziyyat müəllimi Ayla Kara və səkkiz məktəbli qətlə yetirilib, 17 nəfər isə yaralanıb.