Səhiyyə // Bu gün, 21:08

İnfarkt halları getdikcə "cavanlaşır": Səbəb NƏDİR?

"Son illər dünyada, xüsusilə də Azərbaycanda infarkt və insult hallarının, daha dəqiq desək, ürək infarktı və beyin insultunun sayı nəzərəçarpacaq dərəcədə artıb. Daha narahatedici məqam isə bu prosesin getdikcə “cavanlaşması”, yəni gənclər arasında daha çox müşahidə olunmasıdır".

Bunu açıqlamasında tibb eksperti Şahvələd Məmmədov deyib.

O, bildirib ki, bu artımın bir çox səbəbləri və risk faktorları var:

"Əsas səbəblərdən biri həyat tərzinin düzgün olmamasıdır. Gənc insanların əksəriyyətində normal yuxu rejimi pozulub, balanslı qidalanma vərdişləri yoxdur, fast-food və qazlı içkilərə meyillik yüksəkdir. Bununla yanaşı, hərəkətsiz həyat tərzi, idmanla məşğul olmamaq, uzun müddət oturaq şəkildə işləmək, siqaret və alkoqol istifadəsi də riskləri daha da artırır".

Ekspert bildirib ki, bundan əlavə, son vaxtlar metabolik pozğunluqların yayılması da ciddi narahatlıq doğurur:

"Bu pozğunluqların birləşməsi “metabolik sindrom” adlanır və artıq tibbdə ayrıca xəstəlik kimi qəbul olunur. Metabolik sindrom adətən artıq çəki, piylənmə, şəkərli diabet, hipertenziya (yüksək qan təzyiqi) və ürəyin işemik xəstəliyi olan şəxslərdə müşahidə edilir. Bu problemlər isə bilavasitə daha ağır nəticələrə, miokard infarktına, beyin insultuna və hətta beyin qanamasına səbəb ola bilər".

Onun sözlərinə görə, bu baxımdan profilaktika son dərəcə vacibdir:

"Xüsusilə müəyyən yaş həddini keçmiş şəxslər və ya xroniki xəstəliyi olanlar ildə ən azı bir dəfə tibbi müayinədən keçməlidirlər. İmkan olduqda bu müayinələrin hər 6 aydan bir aparılması daha məqsədəuyğundur. Yaşa, çəkiyə və ümumi sağlamlıq vəziyyətinə uyğun olaraq, şəkərli diabet, ürək xəstəlikləri və yüksək təzyiqdən əziyyət çəkən insanlar mütəmadi olaraq həkim nəzarətində olmalı və təyin olunan müalicəni düzgün şəkildə davam etdirməlidirlər".


Demokrat.az