Xəbərlər // 2024 2-iyul, 12:32

Azərbaycan Polisi 106 yaşında

İyulun 2-si Azərbaycan Polisi Günüdür.
Bu gün Azərbaycan Polisinin yaranmasından 106 il ötür.
Ümummilli lider Heydər Əliyevin 24 may 1998-ci ildə imzaladığı 710 nömrəli Fərmanına əsasən, 1918-ci ildə Azərbaycan Demokratik Respublikası Daxili İşlər Nazirliyinin tərkibində ilk polis orqanlarının təsis edildiyi gün - 2 iyul Azərbaycan Polisi Günü elan edilib.
Azərbaycan polisi Birinci Qarabağ Müharibəsi zamanı ölkəmizin ərazi bütövlüyü uğrunda gedən döyüşlərdə fəal iştirak edib. Daxili işlər orqanlarının və daxili qoşunların doqquz yüzdən çox şəxsi heyəti bu müharibədə şəhid olub.
Polisin sıralarında xeyli sayda “Milli Qəhrəman” adına, habelə orden və medallarla təltifə layiq görülənlər var. Elə koronavirusla mübarizədə də onların üzərinə böyük yük düşüb.
2020-ci ilin sentyabr ayının 27-də başlanılan Vətən müharibəsində Daxili İşlər Nazirliyi Daxili Qoşunlarının Xüsusi Təyinatlı Dəstələri qatılıb. Vətən müharibəsinin birinci saatlarında Murovdağ istiqamətində olan əlverişli nöqtələr, o cümlədən Murov zirvəsi işğaldan azad edilib. Murovdağ döyüşləri zamanı “Pələng” və “Şahin” Xüsusi Təyinatlı Dəstələri savaşıb, şəxsi heyətdən 7 hərbi qulluqçu Murovdağ döyüşlərində şəhid olub.
Daxili İşlər Nazirliyi Daxili Qoşunlarının Vətən müharibəsində 66 hərbi qulluqçusu şəhid olub, 346 nəfər yaralanıb, 4 hərbçisi isə Vətən Müharibəsi Qəhrəmanı adına layiq görülüb.
Eləcə də, 2013-cü ilin 19-20 sentyabr tarixlərində Qarabağ ərazisində keçirilən lokal antiter*or tədbirləri nəticəsində şəhid olmuş 12 nəfər Daxili İşlər Nazirliyinin hərbi qulluqçularıdır.
Daxili Qoşunların şəhid olan hərbi qulluqçuları və polis əməkdaşları bu lokal antiterror tədbirlərində də tariximizə yeni qəhrəmanlıq səhifəsi yazıb, şanlı salnaməyə öz qanları ilə imza atdılar.
HESENESKERI.AZ saytı olaraq biz də Azərbaycan Polisini bu əlamətdar gün münasibətilə təbrik edirik!