Xəbərlər // 2025 19-oktyabr, 19:37

Yeni qaydalar taksi xidmətində bahalaşmaya səbəb olacaq? - RƏSMİ

"Qanunvericiliyin tələblərinə uyğun olaraq, taksi minik avtomobilləri ilə sərnişin daşımaları üçün icazələrin əlavələrinin sayına məhdudiyyət tətbiq ediləcəyi barədə 60 gün öncədən məlumat verilməlidir".
HESENESKERI.AZ İTV-yə istinadən xəbər verir ki, bunu Azərbaycan Yerüstü Nəqliyyat Agentliyinin (AYNA) Mətbuat Xidmətinin rəhbəri Tural Orucov bildirib.
Onun sözlərinə görə, taksi fəaliyyəti üçün buraxılış vəsiqələri və buraxılış kartlarının verilməsi 31 dekabra qədər davam edəcək. Bu qərar 1 noyabr tarixindən qüvvəyə minir.
Tural Orucov bildirib ki, növbəti illərdə istehsal tarixindən 15 il keçmiş avtomobillərin taksi fəaliyyəti üçün istifadəsi mümkün olmayacaq. Bu səbəbdən köhnə nəqliyyat vasitələrinin, xüsusən 2011-ci il istehsalı olan avtomobillərin müvafiq müddət ərzində yenilənməsi tövsiyə olunur.
O əlavə edib ki, kvotanın tətbiqindən sonra qiymətlərin artacağı və sürücülərin iş yerlərini itirəcəyi ilə bağlı yayılan məlumatlar yanlışdır:
"Hazırda taksi fəaliyyəti üçün 35 min aktiv icazə mövcuddur. Gün ərzində bunlardan yalnız 22-23 min avtomobil xidmət göstərir. Yəni bazara 25 min kvota tətbiqi çatışmazlıq yaratmayacaq. Əksinə, peşəkar əmək bazarı formalaşacaq və sərnişinlərə göstərilən xidmətin keyfiyyəti yüksələcək".
Tural Orucov qeyd edib ki, limit yalnız nəqliyyat vasitələrinin sayına tətbiq olunacaq və sürücülərin iş yerlərinə təsir göstərməyəcək.

Mövzu ilə bağlı daha ətraflı videomaterialı təqdim edirik: