Xəbərlər // Bu gün, 17:56

Bayramda rayona getmək istəyənlərin nəzərinə! — AÇIQLAMA

Qurban bayramı yaxınlaşdıqca bölgələrə səfər planlaşdıranların sayı artır. Bayram günlərində rayonlardakı hotel və istirahət mərkəzlərinə tələbatın pik həddə çatması daxili turizmdə böyük canlanmaya səbəb olur. Yay mövsümünün başlanğıcı ilə üst-üstə düşən tətil günlərində paytaxt sakinləri sıx qrafikdən uzaqlaşıb regionlara üz tutmağa üstünlük verirlər. Bu axın fonunda hotellərdə yerlərin sürətlə dolması və qiymət artımı daxili turizm bazarının əsas trendinə çevrilir.

Turizm sahəsi üzrə ekspert Rəhman Quliyev Demokrat.az-a deyib ki, bayram tətili hər il olduğu kimi bu dəfə də daxili turizmdə ciddi hərəkətlilik yaradacaq:

“Adətən insanlar həm təbiət, həm sərin hava, həm də ailəvi istirahət imkanlarını nəzərə alaraq seçim edirlər. Bu il də xüsusilə Şəki, Qəbələ, Qusar, Qax, Zaqatala, İsmayıllı və Lerik istiqamətlərinə marağın yüksək olacağını düşünürəm. Xüsusilə dağ və meşə əraziləri yay mövsümünün başlanğıcına təsadüf etdiyi üçün daha çox üstünlük qazanır. Bununla yanaşı, son illər kənd turizminə maraq artıb. İnsanlar artıq təkcə hotel deyil, fərdi evlər, kotteclər və ailəvi istirahət məkanlarını da seçirlər. Qurban bayramı dövründə daxili turizmdə canlanma müşahidə ediləcək. İnsanlar şəhər həyatından uzaqlaşıb qısa müddətli istirahətə üstünlük verirlər. Bu həm turizm sektorunun inkişafına, həm də region iqtisadiyyatına müsbət təsir göstərən amillərdən biridir. Bu il də bölgələrdə yüksək turist axını və aktiv bayram mövsümü gözlənilir”.

Tələbatın kəskin artması regionlardakı yerləşmə vasitələrinin qiymət siyasətinə də birbaşa təsir göstərir. Bayram ərəfəsində daxili bazarda hotellərin gecələmə qiymətlərində təxminən 20-30% artım müşahidə edilir. Xüsusilə populyar dağlıq rayonlarda yerləşən beşulduzlu hotellərdə və lüks kotteclərdə yerlər tətildən bir neçə həftə əvvəl bron edilir. Alternativ axtaran və daha az büdcə ilə dincəlmək istəyən şəxslər isə kənd evlərinə və fərdi villaların kirayəsinə üstünlük verirlər ki, bu da regionlarda fərdi sahibkarlığın gəlirlərini artırır.

Qeyd edək ki, gələn həftə 5 ardıcıl qeyri-iş günü olacaq.